Nabalaka ang UNAIDS sa pagtaas sang HIV sa pungsod, sa diin suno sa ila datos, ang mga apektado sang virus ang naglab-ot sa 543% halin sang 2010, ang pinakamadasig nga bag-o nga kaso sang HIV sa Asia-Pacific.
Samtang nagnubo naman ang kaso sa iban nga pungsod sa rehiyon. Kapin sa 139,000 ka mga tawo ang nagakabuhi nga may HIV sa pungsod, kag ginalauman nga magalab-ot ini sa 252,000 antes matapos ang 2025, suno sa Department of Health (DOH).
Suno kay Health Secretary Teodoro Herbosa, halos 50% sang bag-o nga kaso ang nagikan sa mga pamatan-on nga naga-edad 15-24 anyos.
Ang kalabanan gikan sa mga same-sex relationship, unprotected sex, kag ang nagakilalahay ukon nagagamit sang dating app.
Ang kakulang sang sex educational, kahuy-anan, kag relihioso nga stigma amo ang pila nga nagapanguna nga mga rason sang pagdamo sang mga kaso.
Sang Hunyo, ginrekomendar sang DOH ang pagdeklarar sang HIV bilang isa ka pungsodnon nga emerhensya sa ikaayong lawas sang publiko agud mapadasig ang sabat sang gobyerno, nga wala pa masabat sang Palasyo.
Bisan pa ang gobyerno kag mga NGO pareho sang LoveYourself nagatanyag sang libre nga mga pagtilaw kag pagbulong sa HIV, ang mga rate sang pagtilaw nagapabilin nga manubo—kag ang porsyento sang mga nagabaton sang pagbulong mas manubo pa.
Madamo man nga pamatan-on ang nahadlok nga basi matukiban sang ila pamilya ang ila kahimtangan, gani ginalikawan nila ang pagpabulong.
Ang mga eksperto nagasiling nga kinahanglan nga pabaskugon ang ses educational, himuon nga magamit ang mga condom kag PrEP, kag kuhaon ang stigma batok sa mga tawo nga may HIV.
Sa karon nagapakig-angot ang DOH sa DepEd para sa peer counseling kag updated teaching materials.
