Ginakahangaw-an sang Commission on Population and Development (CPD) ang pagtaas sang kaso sang adolescent pregnancies sa bug-os nga pungsod.
Nahibaluan nga nagaguwa sa datus sang Philippine Statistics Authority nga nagtaas sang 6.6% ang numero sang mga kabataan nga babaye nga may edad nga 10-anyos tubtob 14-anyos nga nagapanganak.
Sadtong 2019, may 2,411 nga kababainhan nga may edad 10-anyos tubtob 14-anyos ang nagpanganak samtang sadtong 2023 nagsaka na ini sa 3,343.
Nagaguwa nga 38 ka kababainhan nga may edad 15-anyos panubo ang nakaeksperyensya man sang multiple pregnancies ukon pila ka beses nga nagbusong sadtong 2023, samtang 17 ka dalagita nga may edad 15 tubtob 20-anyos ang lima ka beses na nga nagbata ukon mas sobra pa.
Ang nasambit nga problema ang nagapanguna kag lapnagon sa mga lugar nga may mataas nga populasyon kasubong sang Metro Manila, Central Luzon, kag CALABARZON.
Suno kay CPD Undersecretary Lisa Grace Bersales, kinahanglan nga mag-angkon sang komprehensibo nga age-sensitive sexual education agud gilayon nga masolusyonan ang nagalala nga kaso sang teenage pregnancy.
Pahayag ni Bersales nga kinahanglan nga mag-angkon sang legisative action para masolusyonan ang nasambit nga problema, kalakip na ang pagkapasar sang Senate Bill 1979 ukon Adolescent Pregnancy Prevention Bill agud maprotektahan ang mga dalagita gikan sa timprano nga pagbusong.
