ROXAS CITY – Lauman ang pagtaas sa presyo sang meat products ilabi na subong nga ber months apang nakadepende ini sa kadamuon sang demand.
Ini ang ginpahayag ni Dr. Leonel Abordo, Provincial Veterinarian sang mainterview sang Bombo Radyo.
Ginkumpirmar sini nga may gamay nga pagtaas sa presyo bangud sa pagtinaas sang presyo sang gatong, nagapanguna nga balaklon kag padayon nga gyera sa tunga sang Ukraine kag Russia.
Apang, nakadepende ini sa mangin demand sang kunsumidor.
Kun maganubo ang demand sang produkto mapilitan ini nga magpanubo sang presyo, sa presyo nga masarangan sang kunsumidor.
Samtang, ginpahayag sini nga bukas na ang probinsya sa pagbaton sang mga produkto kaangay sang baboy, manok kag itlog nagikan sa nagkalain-lain nga lugar sa pungsod maluwas lamang sa Luzon nga tuman nga naapektuhan sang African Swine fever (ASF) kag Avian Flu.
Apang, antes makasulod ini sa probinsya kinahanglan nagasunod ang traders sa pagsulundan sang Department of Agriculture kag kumpleto ang rekisitos.
Nagapanawagan naman si Dr. Abordo nga ipaalinton ukon ipahibalo sa mga otoridad ang mga illegal trading ukon shipment agud malikawan ang pagsulod sang virus sa probinsya nga posible makahalit sa pangabuhian sang mga pumuluyo.
