ROXAS CITY – Overloaded sang magakumpanyar ang hanging bridge nga nagtakilid rason nga nahulog ang 30 ka mga indibidwal sa suba sa Barangay Pang-pang Norte, Mambusao, Capiz.
Sa interview sang Bombo Radyo kay Jomar Legaspi, isa sa mga nagbulig sa mga biktima, ginpahayag sini nga naguba lamang ang hanging bridge matapos nautod ang isa ka kable sang tulay bangud sa sunod sunod nga mga tawo nga nag-agi para magkumpanyar sa isa nila ka himata.
Matapos nagtakilid ang tulay nga himo lamang sa kawayan nagpanic ang mga tawo kag nadulaan sila sang balanse rason nga nahulog sa suba.
Apang maswerte ang iban nga nakauyat sa kable sang tulay bangud nagpabitin bitin lamang sila tobtob nga nag-abot ang mga nagresponde.
Suno pa kay Legaspi nga kadam-an sa ila nabuligan ang nabali ang kamot, tiil, nagsakit ang likod kag nakainum sang tubig sa suba.
Samtang nakaguwa na sa ospital ang iban nga mga biktima matapos madapatan sang pagbulong ang ila mga pilas apang may iban nga nagapabilin pa sa balay bululngan bangud padayon sila nga gina-obserbahan.
