ROXAS CITY – Nangin madinalag-on ang pagtakop sang ginpatigayon nga Public Health Forum sang Capiz PHO sa tagsa ka kabanwahanan sa probinsya sang Capiz.
Ini ang ginpahayag ni Mr. Ayr Altavas, Supervising Administrative Officer kag PIO sang Capiz PHO, sang mainterview sang Bombo Radyo.
Suno diri, ang nasambit nga aktibidad ang may kaangtanan sa inisyatibo ni Governor Fredenil “Oto” Castro agud mas mapasangkad ang sektor sang ikaayong lawas kag isa man sa ila pamaagi agud matapna ang nagkalain- lain nga makahalalit nga balatian nga ginapangatubang sang probinsya.
Sa nagligad nga anum ka adlaw, natapos nila libot ang 17 ka mga banwa kag nangin positibo ang ila paghinun-anon bangud man sa maayo nga pag-abi-abi sang mga katapo sang LGU’s.
Ginsiling sang tagpamaba, padayon ang ila pagpakigbato sa mga nagatuluhaw nga balatian kag ginahinyo sa pumuluyo nga suportahan ang ila mga aktibidad para sa ikaayong lawas sang tagsa ka Capiznon ilabi na sa nagapanghangkat nga pandemya kag pagpamahog sang mga makahalalit nga balatian.
