ROXAS CITY – Pagtan-aw sang utang nga kabalaslan sa nabulig sang panahon nga nagakinhanglan sang dugo ang iloy, ang isa ka factor nga nagdesisyon ang isa ka elementary teacher nga mag-donate sang dugo sa Dugong Bombo 2019.
Sa programa Good Morning Philippines, gintuad ni Micheal John Bade sang Barangay Conciencia, Panit-an nga daku ang nabulig sang dugo nga ila nakuha sa Philippine Red Cross-Capiz chapter, bangud nangin alagyan ini agud masugpunan bisan paano ang kabuhi sang iya iloy nga isa ka cancer patient sadto.
Suno kay Bade nga agud mapakita man ang iya nga pagpasalamat, nagdesisyon ini nga magdonar sang dugo, agud bisan paano makabulig man sa iban nga tawo nga nagakinahanglan.
Ginpakigbahin man sini ang good feeling nga nabatyagan matapos makuhaan sang dugo kag mangin isa sa 631 ka mga successful blood donors sang Dugong Bombo 2019.
Magluwas sini, nahibaluan man ni Bade nga madamo sang health benefits nga makuha kun naga-donate sang dugo ang tawo.
Nalipay man ini sa positibo nga feedback nga iya nabaton matapos nga ginpost sa social media site nga Facebook ang pagdonate sang dugo sa blood letting activity sang Bombo Radyo Philippines.
Ginhangkat man sini ang mga kaupdanan nga mga manunudlo nga magdonate man sang dugo, bangud isa sa mga panindugan sang mga educators nga ‘’We are raise ta aspire and inspire people’’.
