Daku ang mabulig sang padayon nga pagtanum sang mga kahoy sa pagpreserbar sang forest cover sa probinsya sang Capiz.
Sa interview sang Bombo Radyo kay Dr. Ernest Federiso, Provincial Environment and Natural Resources Officer sang DENR-Capiz, iya ginpahayag nga importante ang tree planting agud maproteheran ang palibot kag malikawan ang nagadugang nga epekto sang climate change.
Suno kay Federiso, sa subong nga possible maka-eksperyensya ang pungsod sang mas mainit nga panahon bangud sang Super El Niño kag indi regular ang pag-ulan, nagapadayon ang peligro sang gilayon nga pagbaha sa nagkalain-lain nga lugar.
Pahayag pa niya, ang mga kahoy ang nagabulig man sa pagpugong sang landslide ilabi na gid sa mga kabukiran kag iba pa nga mga lugar nga wala sang flood control structures, bangud ang gamot sang mga ini nagapabakod sang duta kag nagapamenos sang erosion.
Nahibaluan nga kahapon nga adlaw ginsaulog ang National Arbor Day 2026, kun sa diin nagpatigayon sang tree-growing activity ang mga nagkalain-lain nga ahensya sang gobyerno kag mga stakeholders.
Sa amo nga aktibidad, kapin sa 12,000 ka mga mangrove, forest trees kag fruit trees ang gintanum sa nagkalain-lain nga mga lugar sa probinsya.
Nagalaum naman ang natugdan nga pinaagi sa sini nga inisyatibo, mas mapabakod pa ang konserbasyon sang palibot, maproteheran ang palibot, kag masiguro ang mas manami kag mas luwas nga palaabuton para sa masunod nga mga henerasyon.
