Ginkumpirma ni Capiz Governor Esteban Evan Contreras II nga posible ma-terminate ang kontrata sang contractor nga naga-uyat sa proyekto nga rehabilitasyon sang karsada sa Barangay Ilaya, Pontevedra, Capiz.
Suno sa gobernador nga ginpakaayo ang nasambit nga dalan bangud sa gubaon na ini kag nagahatag sang huol sa mga biyahero.
Apang natukiban nga wala pa matapos ang proyekto bangud sa pila ka mga rason sang kontraktor nga indi balido.
Ginpahayag sang opisyal nga ginpadalhan na sang termination letter ang contractor kag ginhatagan sang tsansa nga makasabat..
Indi malipod nga 5% pa lamang sang proyekto ang natapos kag daku nga bahin pa sang dalan ang dapat kaayuhon, apang kasubong ginpabayaan ini.
Agud maibanan ang perwisyo nga gintuga sang contractor sa wala gintapos nga trabaho, gin-instruksyunan sang gobernador ang Provincial Engineers Office nga butangan ang karsada sang buga.
Dapat nga sang nagligad nga bulan sang Marso matapos ang proyekto, apang bangud sa ginasiling problema nga ginapangatubang sang contractor kag sang partner sini apektado diri ang mga pumuluyo.
Sa karon ginahulat ni Governor Contreras ang final report ukon endorsement sang termination committee, sa diin daku ang posibilidad nga i-ban na ini nga contractor sa pagpasakup sa anuman nga bidding sa mga proyekto sang gobyerno kag posible pa nga mangin blacklisted ini.
