Pagtib-ong sa kabataan kag turismo ang nangin sentro sang adbokasiya sang Capiznon Representative sa Mister Island Tourism Philippines 2026.
Sa interview sang Bombo Radyo kay Rodney Barrios, tumandok sang Barangay Dumulog, Roxas City, iya ginpahayag nga antes pa man siya magpasakop sa national pageant, aktibo na ini sa pagsakop sa nagkalain-lain nga pageant sa probinsya sang Capiz nga nangin instrumento man agud mapalapnag ang iya adbokasiya para sa mga kabataan.
Suno kay Barrios, importante nga mabatian kag masuportahan ang tingog sang kabataan bangud may yara sila sang importante nga papel sa pag-uswag sang komunidad kag sang pungsod.
Pahayag pa niya, daku man ang kalipay sini bangud pinaagi sa kompetisyon napakita kag na-promote sini ang katahum sang Capiz sa national stage.
Sa subong, plano anay sang natungdan nga magpokus sa iya trabaho apang padayon gihapon sini nga isulong ang iya adbokasiya para sa kabataan kag pag-promote sang turismo sang Capiz sa bisan ano nga pamaagi.
