ROXAS CITY — Kumplikado nga relasyon sa paghigugma ang isa sa mga ginalantaw motibo sang kapulisan sa natabo nga pagpangluthang-patay sang isa ka lalaki sa Crossing Lanot, Barangay Lanot sining syudad sang Biyernes sang gab-i.
Sa interview sang Bombo Radyo sa hepe sang Roxas City Police Station nga si Superintendent Dante Tayco, nagaguha sa ila imbestigasyon nga may yara sang relasyon si Erna Clavaton, asawa sang biktima nga si Jorly Vim Calavaton sa suspek nga si Erwin Belo.
Suno kay Tayco, kapin isa ka tuig na ang tago nga relasyon ni Clavaton kag Belo apang ginapahayag nga luyag na nga magkalas sang babaye.
Ginapatihan nga may ideya naman ang napatay nga biktima sa relasyon sang iya asawa kag sang suspek.
Apang indi magpasugot si Belo bangud ang luyag niya amo nga bayaan na ni Clavaton ang iya bana agud sila ang mag-upod nga duha.
Sang wala magpasugot si Clavaton sa luyag ni Belo, didto kag nagsugod na suno kay Tayco ang pagpangharas sang suspek sa babaye kag may mga ginbuy-an na ini nga pamahog.
Nahibaluan pa suno kay Tayco nga nagdangop na sa Criminal Investigation and Detection Group ukon CIDG – Capiz ang babaye bangud sa mga pagpamahog sa iya sang suspek.
Apang wala ini magdahum-dahom nga ang iya bana nga si Jorly Vim ang patyon ni Belo.
Nahibaluan nga may tatlo na ka mga kabataan ang mag-asawa nga Clavaton, samtang may duha man ka bata si Belo apang bulag sa iya asawa.
