ROXAS CITY – Ginkumpirma sang alkalde sang syudad ang pagtukod sang kaugalingon nga real-time polymerase chain reaction (RT-PCR) testing laboratory.
Suno kay Mayor Ronnie Dadivas nga lauman ang pag-abot sa Roxas City sang ginbakal nga relocatable, containerizedRT-PCR machine nga santu sa standard sang Department of Health (DOH)sa masunod nga mga inadlaw.
Katuyuan sini nga mapreparahan sang temprano sang syudad ang ginalauman nga pag-alabutan sang mga Locally Stranded Individuals (LSIs), OFW repatriates, kag pagbalik sang commercial flights sang eroplano kag barko.
Ginpahayag sang opisyal nga kinahanglan sa wala pa nag-alabutan ang dugang nga numero sang mga na-stranded nga mga indibidwal naka-preparar na ang syudad bangud daku ang mabulig sini agud mangin madasig ang pagproseso sang resulta sang magapaidalum sa RT-PCR test .
Ginpasalamatan man ni Mayor Dadivas ang mga katapu sang City Council, department heads kag representante sang mga ospital sa ginhatag nga advice kag suporta agud mahatagan katumanan ang nasambit nga plano.
Ginpasiguro man sang alkalde nga indi lamang ini exclusibo sa mga LSIs ukon repatriated OFWs nga residente sang syidad bangud mahimo man nga ma-cater ang yara sa kabanwahanan.
Nagpakig-estorya naman ang alkalde sa mga private hospitals kag ginpresentar nga ang gobyerno sang syudad ang magabakal sang machine samtang ang hospital staff naman ang maga-operate, manage kag maga-maintain sang amo nga equipment.
Nagapati si Mayor Dadivas nga samtang wala pa sang bakuna, ang pinakaepektibo nga pamaagi agud matapna kag indi maglapta ang COVID-19 amo ang pagtest, pagtrace kag pagtreat nga mahimo lamang sa RT-PCR machine.
