ROXAS CITY – Wala magustuhan sang gobernador ang alegasyon nga nagatumod sa isa ka Capizeño nga biktima sang vehicular accident nga ginpadangat sa ospital sa Iloilo para sa dugang nga pagbulong nga ginhalinan para malatnan sang COVID-19 ang walo ka mga doktor sa St. Paul’s hospital sa Iloilo.
Ginpahayag ni Governor Esteban Evan Contreras II nga sa baylo nga diri ma-sentro ang isyu angut sa paglockdown sang amo nga ospital bangud sa mga doktor nga na-expose sa isa ka pasyente nga ila ginbulong nga nagpositibo sa test mas maayo nga magbuligay na lamang ang tanan, agud matapna kag malikawan ang ini nga balatian.
Suno kay Governor Contreras nga bilang mga frontliners, yara sa ila ginsumpaan nga bulngon kag tatapon ang tanan nga nagakinahanglan sang medical help.
Importante man nga magpatigayon sang precautionary measures ang mga doktor ukon nurses samtang ginahimo nila ang pila ka mga procedures agud maamligan man ang ila kaugalingon.
Ginpahayag sang gobernador nga ba-se sa impormasyon nga ginpalab-ot sa iya nga initial assesstment pa lamang nga sa pasyente nga taga Capiz nakuha sang mga doktor ang balatian.
Makabig nga premature pa ang isyu kag ginpadaku lamang sang iban nga mga tawo.
Nagpangabay man ang opisyal nga kuntani mangin responsable lang ang tanan sa ila ginabuy-an nga tinaga, agud indi sila makasakit sa balatyagon sang iban.
Ginkumpirma man ni Governor Contreras nga sa pihak nga wala pa sang kasiguraduhan nga sa diin nakuha sang mga doktor ang virus, apang diri sa probinsiya ginsuguran na ang contact tracing sa pribado nga ospital nga una gindalhan sa pasyente sa Roxas City, sa iya pamilya kag sa mga nakaangkon sang close contact sa iya.
