ROXAS CITY — Wala pa makabaton sang direktiba gikan sa Commission on Higher Education ang Capiz State University may kaangtanan sa buot ipatuman nga moratorium sang ahensiya sa mga field ukon educational trips sa kolehiyo, kasunod man sang natabo nga trahedya sa Tanay, Rizal nga ginkamatay sang 15 ka mga persona.
Apang suno sa campus administrator sang CAPSU – Main Campus nga si Dr. Wennie Legario, handa man sila nga magtuman sa mangin mando sa ila sang CHED may kaangtanan sini.
Apang aminado si Legario nga makaapekto sa pagtuon sang pila ka mga estudyante sa CAPSU pananglitan ipatuman sang CHED ang moratorium.
Suno kay Legario, may mga kurso sila kaangay sang architecture kag engineering kun sa diin kabahin sang ila curriculum ang pagpatigayon sang field trips agud ma-expose ang mga estudyante sa mga teknolohiya nga may kaangtanan sa ila nga patag.
Ginpaathag niya nga kinahanglan nga makalakat ang mga estudyante sa iban nga lugar, bangud indi makita diri sa Capiz ang ini nga mga teknolohiya kag installations nga kaangay sang mga planta nga kinahanglan nga aktwal nga mabisitahan sang mga estudyante agud ila maobserbaran kag matun-an ang pagpalakat sini.
Suno pa sa iya, nakasandig sa maayo nga pagdumala sang eskwelahan ang pagpatuman sang isa ka siguro kag hilway nga field trip.
Nagapati man siya nga isolated incident lamang ang natabo sa mga estudyante sang isa ka kolehiyo sa Novaliches, Quezon City nga naaksidente sa Tanay, Rizal kadungan sang ila ginpatigayon nga field trip.
Suno kay Legario, malawig nga tinuig naman siya nga naghawid sini nga mga programa sang eskwelahan apang ginapasiguro niya nga matuman ang tanan nga mga regulasyon antes sila magbiyahe rasun nga nangin hilway tanan ang ila nga mga lakat.
