Ini ang ginkumpirma ni anay SB member Wildie Doronio kadungan ang pagklaro sang pila ka nagalapta nga impormasyon sa rason sang pagwithdraw sang anak sa liwat pagpapili bilang SB member sa ila banwa.
Ginpanindugan ni Doronio nga wala sang kamatuoran nga nakabaton sila sang kuwarta gikan sa nagapadalagan sa pagka-alkalde sa idalum sang Liberal Party sa diin mabakud ebedensiya ang bag-o nga Innova nga salakyan nga ginagamit sang ila pamilya.
Kalakip sa ginpaintiende nila sa anak nga si Kimberly kun dayunon sini ang pagpapili nga mangin limitado ang mga proyekto nga mabaton sang Barangay East Villaflores, Maayon sa diin nagaserbe bilang punong barangay ang tiyo sini. Aminado man ini basta magpadalagan ang isa ka kandidato, dapat may nagakaigo ini nga pondo nga gamiton sa diin may yara na sila sang napa-in nga kantidad, apang indi ini supisyente.
Wala man nalikawan nga tumuron ni Doronio ang pangalan ni Dodoy Diestro nga ginapatihan sini nga amo ang nagapalapta sang sala nga impormasyon angut sa ila bag-o nga salakyan nga ginaalegar kabayaran sa pagwithdraw sang kandidatura sang anak.
Suno sa anay SB member nga gikan sa ila anak nga nagatrabaho sa Dubai ang kuwarta nga ginbakal sang salakyan pinaagi sa installment basis kag gindugangan lamang sang anak nga si Kimberly.
Samtang ginkumpirma sini nga ang iya tiayon ang nagpakigkita sa nagapadalagan sa pagka-alkalde sa idalum sang LP kag ginhinyo nga kun ma-regular kag mahatagan sang mataas nga posisyon ang iya anak nga si Kimberly, ila gid ini pasalamatan.
Ginpasiguro pa ni Doronio nga indi mangin dehado ang munisipyo kun kuhaon ang serbisyo ni Kimberly bangud naga-ekwela ini sang law sa karon kag pasado sa teacher’s board exam.
