ROXAS CITY – Kasubong nangin isa ka patugmahanon ang rebelasyon ni provincial administrator Edwin Monares sa sesyon sang Sangguniang Panlalawigan kun sa diin gintalakay ang kontrobersiyal nga scholarship program sang gobyerno-probinsiyal.
Mahibaluan nga sang gin-usisa ang administrador sang mga miyembro sang konseho natuhoy sa nasambit nga programa, gintuad ni Monares nga indi siya makahatag sang bug-os nga impormasyon bangud may yara sang mga mabutang sa alang-alang kag maiguan.
Suno sa administrador nga kun iya nga ibuyagyag ang ila natukiban sa ila ginpatigayon nga imbestigasyon, may mga pangalan suno sa iya nga mahuy-an bangud sa amo nga isyu.
Ginpanindugan ni Monares nga may mga impormasyon nga indi na dapat mahibaluan sang publiko kag ang scholarship program ang separado na lamang nga talakayon.
Bangud sa halangpon nga pahayag ni Monares, nagsabat diri si Board Member Ricky Martin nga anuman ang mga rebelasyon ni Monares, nagakadapat nga mahibaluan ini sang publiko bangud obligasyon nila ini bilang mga public servant.
Suno kay Martin nga wala ini nagapabor nga sa separado pa nga executive session talakayon ang scholarship program.
Gin-segundahan man ni Board Member Jonathan Besa ang pahayag ni Martin apang suno sa iya nga kun may yara sang mga rebelasyon si Monares, nagakadapat nga suportado ini sang mabakod nga mga ebidensiya.
Anuman suno sa iya ang mangin pahayag ni Monares ang dapat niya nga pamatud-an ilabi pa kun may igatuad ini nga mga pangalan nga maulamid sa nasambit nga isyu.
Kasunod sini, gin-usisa ni Board Member Matt Hachuela si Monares kun ano na ang matuod-tuod nga estado sang scholarship program sang gobyerno-probinsiyal.
Kag bangud wala ini direkta nga ginasabat sang administrador, kasubong nagtaas ang tingog ni Hachuela kag direkta nga ginpamangkot si Monares kun mabaydan pa gidman ang scholarship ukon indi.
Sabat naman ni Monares nga pagabaydan ini sang gobyerno-probinsiyal apang indi sini mapat-od kun pila ang kantidad nga igabayad tagsa ka scholars sa idalom sang nasambit nga programa.
