ROXAS CITY – Nagapabilin nga missing ang lalaki nga pahinante sang trak matapos ginaalegar naglumpat sa ginasakyan nga barko sa kadagatan nga sakop sang Sibuyan, Romblon.
Ginkilala ang biktima nga si Rommel Layson, 22 anyos, sang Barangay Poblacion, Jamindan, Capiz kag nagatrabaho bilang pahinante sang Storm Signal Trading.
Sa interview sang Bombo Radyo kay Emelia Layson, iloy sang biktima, ginpahayag sini nga base sa ila nabaton nga impormasyon gikan sa mga kaupdanan sang anak, una na nga naglumpat ang biktima sa nasambit nga barko apang gilayon man ini nga na-rescue sang mga otoridad.
Ginapahayag nga pag-abot sa kadagatan nga sakop sang Sibuyan, liwat naman nga naglumpat ang biktima.
Suno sa iloy nga yara pa sa Batangas port ang iya anak sang ulihi niya ini nga na-estorya sa telepono.
Sakay ang biktima sa Starlite Ferry nga natalana nga magdungka sa Culasi Port sa Barangay Culasi, Roxas City.
Nagapadayon naman ang search and retrieval operation sang Philippine Coast Guard sa biktima.
