PAL flight Dumaguete – Manila, nag-emergency landing sa Iloilo bangud sa oxygen issue

ILOILO CITY – Nag-emergency landing sa Iloilo International Airport ang flight sang Philippine Airlines (PAL), halin sa Dumaguete padulong sa Manila bangud sa kakulang sang oxygen sa eroplano.

Sandig sa report, natabo ang insidente samtang yara sa cruising altitude nga ginabanta 32,000 ka tapak sang eroplano.

Suno sa advisory nga ginpost sang Iloilo International Airport, ang eroplano luwas nga naghugpa mga alas 4:30 p.m.

Pila ka mga pasahero ang nagkinahanglan sang gilayon nga medical attention pag-abot sa airport.

Sa karon gina-imbestigaran pa ang gintunaan sang insidente.