ROXAS CITY – May palabra de onor ang gobernador sang probinsiya sa mga ginabuy-an sini nga pahayag!.
Ini ang nangin pahayag ni Provincial Engineer Edgar Agana kasunod sang mga nagalapta nga report nga indi na paghulaton ang pagretiro sini sa bulan sang Mayo kag pagatal-usan na subongman ang ginasiling indi na pagsuporta sa iya sa posisyon bilang kongresista sang gobernador.
Suno kay Engr. Agana nga anuman ang mangin desisyon ni Governor Esteban Evan Contreras II ang iya paga-respetuhon, apang ginapanindugan sini ang pagkakilala sa gobernador nga may palabra de onor.
Posible may iban lamang nga malapit ukon nagapalibot sa gobernador ang nagaguba sang iya imahen kag nagapakalain sa iya.
Apang bisan san-o wala siya nagasupak sa mga ginasugo ni Governor Contreras.
Sa pagkamatood humalin nga nagpungko bilang gobernador si Contreras sang Hulyo 1, 2019, wala ini sang ginhimo nga kontra sa polisiya ukon direktiba sang gobernador bangud tanan nga iya suguon ang ginasunod sini.
Gani para kay Agana, wala sang rason para isikway ukon balewalaon na lamang ang tanan nga iya ginhimo para sa kaayuhan sang probinsiya.
Kun wala na sang salig ang gobernador sa isa ka department head, mahimo niya ini nga ma-assign sa iban nga departamento ukon talatapan, apang dapat may balido nga rason.
Ginpanindugan sang opisyal nga anuman ang malab-utan nga desisyon sang gobernador ang iya respetuhon, apang kun ano ang iya nasuguran sang naglibot-libot ang posible nga padayunon sini.
Samtang pag-abot naman kay Mayor Esteban Contreras sang Pontevedra nga ginasiling ginaduso nga magpadalagan bilang kongresista sa premier distrito sang Capiz, suno kay Agana nga daku man ang iya pagrespeto sa amay ni Governor Nonoy, bangud ini ang naghurma sa iya kun diin siya napahamtang sa karon.
Indi lamang abyan ang pagkabig sini kay Mayor Contreras, kundi utod kag isa ka amay nga sarang masandigan.
Nagapati si Agana nga indi maghimo sang anuman nga desisyon ang alkalde nga nahibaluan sini may yara siya sang matapakan.
