ROXAS CITY – Nagapati ang hepe sang Maintenance and Construction Division sang Department of Public Works and Highways (DPWH) Capiz 1st Engineering District nga kinahanglan pungkuan kag estoryahan sang Local Government Unit ang ginpapanaug nga memorandum circular 036-2020 sang Department of Interior and Local Government nga nagadumili sa mga tricycle sa pag-agi sa national highway.
Ginpahayag ni Engr. Julius Abela nga dapat amat amat lamang ang pagpatuman sini kag indi paggulpihon bangud madulaan sang palangabuy-anan ang mga tricycle operators kag drivers.
Kinahanglan man nga mapangitaan ini sang alternatibo nga solusyon bangud isa ini ka laye nga dapat sundon.
Sa bahin sang DPWH, suno kay Abela may ginpapanaug nga Department Order No. 73 Series of 2014 nga nagadumili sa obstruction/encroachment ukon usurpation sa right of way sa karsadahon.
Klaro sa mandu nga wala sang istraktura nga nagaserbe nga sablag sa mga karsada kasubong sang mga poste ukon talyer bangud nagalapas ini sa pagsulundan.
Ginpanindugan man ni Abela ang direktiba ni President Rodrigo Duterte sa mga local government units (LGU’s) nga mahawanan ang tanan nga ma-identify nga road obstruction bilang pagtuman sa kampanya sang gobyerno nga Road Clearing Operation 2.0.
Matandaan nga ginhatagan sang 75-diyas ang mga LGU’s nga i-comply ang direktiba kag hawanan ang tanan nga obstruction sa road network.
