ROXAS CITY – Ginapaguba kag ipakay-o liwat sang Local Government Unit (LGU) sang Tapaz ang palpak nga paghimo sang dalan sa pila ka mga barangay partikular ang Barangay Malitbog, Switch, San Jose kag Poblacion.
Sa pagpakig-angut sang Bombo Radyo kay Victor Jimenez Municipal Engineer sang amu nga banwa, sa ila ginpatigayon nga joint inspection kaupod si Tapaz Mayor Roberto Nonong Palomar, Department of Public Works and Higways (DPWH) kag Municipal Engineering Office sang ila banwa, ginsiling sini nga yara sa masobra 800 meters nga dalan ang liwat nga pagagub-on kag kay-uhon.
Ini bangud sa palpak nga paghimo sang CLY-ABC Builders nga amu ang contractor sang proyekto.
Suno kay Jimenez, ang nasambit nga proyekto may yara sang masobra P52-M nga pondo ang gin-alokar ang amu nga banwa.
Mahibaluan nga base sa datos nga ginpasa sa ila sang CLY-ABC Builders, nagsugod ang amu nga proyekto sadtong Marso 5, 2023 kag natalana kun tani nga matapos Disyembre 9, 2023 kung sa diin 52.82% pa lamang ang ila natapos.
Bangud sini, nadesisyunan sang LGU Tapaz kag DPWH nga kay-uhon na lamang ini agud malikawan ang aksidente sa lugar.
Samtang ginsiling man ni Jimenez nga sa karun, wala pa sila sang may nabaton nga formal letter nagikan sa nasambit nga contractor.
