Ginpamatukan sang Pamalakaya-Panay ang panukala nga amyendahan ang Juvenile Justice and Welfare Act kag papanaugon sa 12-anyos ang edad sang criminal liability.
Ini kasunod sang panawagan ni Sen. Robin Padilla matapos ang insidente sang pagpangluthang sa San Jose National High School sa Barangay San Jose, Tacloban City.
Sa interview sang Bombo Radyo kay Nathaniel Baga-ot, spokesperson sang amo nga grupo, iya ginpahayag nga indi ang pagpapanubo sang edad sang criminal liability ang nagakaigo nga solusyon sa kriminalidad nga ginakalakipan sang mga menor de edad.
Suno kay Baga-ot, ang mga kabataan nga nalakip sa children in conflict with the law(CICL) indi dapat gilayon nga kabigon nga mga kriminal, bangud kadam-an sa ila ang naapektuhan sang kapigaduhon, kakulangan sang suporta sang pamilya, kakulangan sa edukasyon kag bulok nga sistema.
Dugang pa sang natungdan, mas kinahanglan nga pagapasangkaron sang mga programa sa rehabilitasyon, edukasyon, kag proteksyon sa kabataan imbes nga panubuon ang edad sang criminal liability.
