Pamilya ang nangin pinakamabaskog nga inspirasyon ni Architect Allen Matthew Apolinario agud mapasar ang Architect Licensure Examination 2026, bisan pa sang madamo nga pagtilaw nga iya naagyan antes maab-ot ang iya handum.
Sa interview sang Bombo Radyo kay Apolinario, iya ginpahayag nga indi madali ang iya pagpreparar para sa board examination bangud sa kabudlay sang mga leksyon nga kinahanglan tun-an kag masabtan.
Dugang pa sini, nag-agi man siya sa emosyonal nga kabudlayan matapos ang wala ginapaabot nga pagkapatay sang iya malapit nga abyan, nga naghatag sang trauma kag nakaapekto sa iya pagtuon.
Apisar sini, wala siya nagpadala sa kapigaduhon kag nagpadayon sa pagpaninguha tubtob nga napasar niya ang eksaminasyon.
Nagpasalamat man ang natungdan sa iya pamilya, mga abyan, kag sa tanan nga naghatag sang suporta, pag-salg kag pagpalig-on sa iya sa bug-os nga tion sang iya preparasyon, nga amo ang nangin kabahin sang iya kadalag-an bilang isa ka lisensyado nga arkitekto.
