ROXAS CITY, CAPIZ- Tuman ang pagpasalamat sang isa ka board passer sa Ginoo nga nagin madinalag-on ini sa ginpatigayon nga August 2025 Criminology Licensure Examination.
Sa interview sang Bombo Radyo kay Raniel Steven Boral, tumandok kag Sangguniang Kabataan Chairman sang Barangay Tiza, Roxas City, Capiz kag board passer sang August 2025 Criminology Licensure Examination, iya ginpahayag nga ang ila bug-os nga pamilya kag iya handom para sa kaugalingon ang nangin inspirasyon agud nga magtimakas sa paglab-ot sang amo nga lisensya.
Suno kay Boral, kaangay nga indi sya makapati sa nangin resulta bangud nga nangin madinalag-on ini sa una palang nya nga kahigayunan nga magkuha sang amo nga pasinawan.
Pahayag pa nya, indi nangin mahapos ang iya nga mga naagyan agud malab-ot ang amo nga kadalag-an, sa diin nga ginkinahanglan pa sini nga mangin flexible, indi lang physically kundi pati mismo sa time bangud nga nagapangalagad pa ini sa mga kabataan nga iya nasakupan.
Dugang pa sini, ang amo nga kadalag-an ang ginadedikar nya indi lamang sa iya nga kaugalingon kundi sa iya bug-os nga pamilya nga naghatag sang todo nga suporta.
Mensahe sini sa kaangay man nga estudyante kag magakuha sang exam, indi mag-untat sa paghandum, pagpangamuyo, magsalig sa ikasarang sang kaugalingon kag indi pagkalipatan nga atipanon ang kaugalingon.
Interviewed by Bombo Francis Biñas and Bombo Sunnie Mae Batencila
