ROXAS CITY – Tuman na lamang ang kasubo nga nabatyagan sang pamilya Ledesma matapos nga gin-igo sang kilat ang mag-iloy sa Sitio Agcagay, Barangay Bunga, Mambusao, Capiz.
Sa interview sang Bombo Radyo kay Reche Ledesma, utod sang biktima nga pito sila kabilog sa sulod sang ila balay sang natabo ang insidente.
Suno kay Reche nga mabaskog ang ulan kun sa diin mabatyagan ang pagpanaguob kag pagkilat sa nasambit nga lugar.
Dugang pa sini nga magkaupod sila nga nagahigda kun sa diin nagbangon pa ang biktima nga si Rochelle agud mag CR kag gintabunan pa sang tela ang ispiyo kasunod sang asud-asud nga pagkilat.
Bangud diri, ang anom katuig sini nga bata nga luyo ni Rochelle ang nagahigda sa iya abaga kag nagahakos sa iya bangud man sa kahadlok sang asud-asod nga pagpanaguob kag pagkilat.
Ginpahayag ni Reche nga samtang nagahigda sila yara sa ulohan ni Rochel ang bass ukon speaker kun sa diin may yara sang saksakan.
Sa nasambit nga saksakan nagasaksak ang duha kabilog nga eletricfan kag may mga cellphone nga gina-charge.
Magluwas diri, dugang pa sini nga naga-facebook pa ang biktima apang gilayon man sini gintago ang cellphone pinaagi sa pagtabon sang habol.
Samtang, hinali na lamang nga nagkilat sang todo sa kahoy sang lubi kun sa diin ginapahayag nga didto naglatay ang wire sang kuryente sa ila ginasaksakan malapit sa duha ka nasambit nga biktima.
Kasunod sini nga nakabati na lamang sila sang mabaskog nga lupok nga gintunaan sang brownout rason nga gilayon ini nga nagpasiga sang flashlight kag didto nakita ni Reche nga pilason na ang mag-iloy kag nagadugo na ang dulunggan kag ilong.
Gilayon naman ini nga nagpangayo sang bulig sa mga residente sa ila nga lugar kun sa diin gintinguhaan pa nga madala sa ospital ang mag-iloy apang gindeklar ang mga ini nga dead on arrival.
Mahibaluan nga subong nga adlaw kuntani magapauli ang biktima sa bahin sang Antique agud nga mag-apas sa iya bana matapos nga napatay man ang iya nga ugangan.
