Ginbuyagyag ni Baguio City Mayor Benjamin Magalong nga indi luyag sang pamilya ni anay DPWH Undersecretary Maria Catalina Cabral nga ipaidalom sa autopsy ang bangkay sini.
Suno sa alkalde, nadesisyunan na ini sang pamilya.
Kabaliskaran ini sa nauna nga report sang Department of Interior and Local Government (DILG) nga padayon nga ginapaidalum sa autopsy ang bangkay sang napatay nga undersecretary.
Ginpanindugan ni Magalong nga una man nga nagserbe nga pinuno sang Criminal Investigation and Detection Group nga mas maayo kuntani nga ipaidalom sa autopsy ang bangkay sang napatay nga opisyal, ilabi na nga makaduluda ang insidente sang iya kamatayon.
Tubtob subong, nagapabilin nga misteryo kun naghikog ang anay opisyal ukon may foul play sa iya kamatayon matapos narekober ang iya bangkay sa pil-as sa banwa sang Tuba, Benguet.
Una man nga nag-apelar ang Independent Commission for Infrastructure nga ipatigayon ang maid-id nga imbestigasyon sa kamatayon sang anay opisyal agud mahibaluan kun may foul play nga natabo.
Nagapabilin man sa kustodiya sang mga otoridad ang driver ni Cabral nga si Ricardo Munos Hernandez.
Ginapatihan man nga si Hernandez ang katapusan nga nakita kay Cabral antes ini nasapwan nga nga wala na sang kabuhi.
