Isa ka sikat nga restaurant sa Sydney, Australia ang nagpaguwa sang paandam sa kapareho nga mga establisyemento matapos nga nabiktima sang scam. Isa ka pamilya sang mga turista gikan sa Ireland ang gina-akusahan nga hungod nga nagbutang sang armpit hair sa ila meal order agud malikawan ang balayran nga $600 (masobra P33,000).
Suno sa report, nag-order ang pamilya sang malahalon nga pagkaon, lakip ang 1.8kg nga tomahawk steak, entrees, kag ilimnon. Matapos halos ubuson ang ila pagkaon, nagreklamo ang pamilya nga may buhok sa ila pinggan.
Didto na nga ginreview sang head chef sang Pony nga si Neil Nolan ang CCTV footage kag nakit-an ang modus operandi sang lalaki nga customer. Makita sa CCTV sang manugtapos na sila sa pagkaon, amat-amat niya nga ginkuha ang isa ka buhok sa iya kaugalingon nga kilikili kag ginbutang ini sa iya pinggan antes magtawag sang isa ka waiter.
Nagpangakig ang lalaki kag nagpamalibad nga magbayad samtang nagahilibion ang iya kaupod nga babaye agud maghimo sang eksena.
Natalupangdan sang kitchen staff nga ang buhok sa pinggan blonde, bisan pa nga wala sang isa sa ila mga kusinero ang blonde. Agud indi madisturbo ang iban nga customer, napilitan ang tagdumalahan nga i-waive ukon ilibre na lang ang bug-os nga bill.
Natukiban man nga peke ang ginbilin nga contact details sang pamilya rason nga nahalin sila sa lugar.
Gin-share ni Nolan ang video sa social media agud paandaman ang iban pa nga mga hospitality venues batuk sa sini nga sahi sang modus.
