ROXAS CITY – Ginpasalig sang lokal nga gobyerno sang banwa sang Sigma nga buligan ang pamilya sang duha ka mga frontliners nga napatay matapos nagbungguanay ang ambulansya sang Sigma Disaster Risk Reduction and Management Office kag Montero Sports sa National Highway sang Barangay Ondoy, Ivisan, Capiz.
Sa nangin interview sang Bombo Radyo kay Bobbies Bernas, Municipal Administrator sang nasambit nga banwa ginpahayag sini nga ginkasubo sang bug-os nga munisipyo ang pagtaliwan sang mga frontliners nga sanday Darius Yap kag Ernie Fulgencio kag pagkapilas ni Rey Castillon nga madugay na nga miyembro sang MDRRMO-Sigma.
Suno kay Bernas nga nagmando si Sigma Mayor Christoher Andaya nga ihatag ang tanan nga kinanglanon sang mga napatay kag napilasan nga mga frontliners kutob sa masarangan sang ila banwa.
Ginkompirmar sini nga may yara kuntani sang sugaton nga mga Locally Stranded Individuals sa siyudad ang ambulansya nga ginasakyan sang mga biktima.
Magluwas diri, ginpasalig man ni Bernas nga buligan ang pamilya nga mahatagan sang hustisya ang kamatayon sang duha ka mga frontliners.
Matandaan nga nagbungguanay ang ambulansya sang Sigma MDRRMO kag Montero Sports nga ginamaneho ni Police Captain Alcer Monsera, hepe sang Dumalag Municipal Police Station sakay ang mga pasahero nga sanday Oliver Aguihap kag Romelyn Baldado.
