ROXAS CITY – Hustisya ang ginasinggitan sang pamilya sang 21-anyos nga senior high school student nga gindakup sang mga katapu sang Regional Drug Enforcement Unit ukon RDEU sa drug buy bust operation sa Sitio Bliss, Barangay Cagay sang Domingo nga adlaw.
Ginpahayag ni Emok Bracamonte, tiyo ni Prince Dave Doncillo nga wala naga-entra sa anuman nga iligal nga aktibidad ang iya hinablos.
Ginkakibot sini sang gintundaan nga gindakup si Prince Dave bangud sa pagduso sang iligal nga droga.
Indi siya halos makapati sang makita nga nakaposas ang kamot sang hinablos kag naga-atubang ini sa lamesa sa diin ginpahamtang ang ginaalegar shabu nga nakuha sang mga kapulisan.
Ginpasikto man sini si Prince kun sa iya gid man nakuha ang mga plastic sachet sang shabu apang nagapanindugan ang hinablos nga bisan mapatay ini wala siya nagaduso sang droga.
Suno kay Bracamonte nga kilala sini si Prince nga maayo nga bata kag nagpauli lamang ini agud diri ipadayon ang pag-eskwela.
Ginkumpirma sang tiyo nga nagakadto sa balay sang iya iloy nga lola ni Prince ang hinablos bangud didto ini nagakaon.
Ginpahayag ni Bracamonte, pag-abot kay Jocelyn Cabisilla, live-in partner sang utod sa iloy nga karon napreso bangud sa kaso may kaangtanan sa iligal nga droga, indi niya ini masyado nga kilala.
Nagapati man ini nga wala naga-estorya si Prince kay Jocelyn bangud matapos magkaon ang hinablos sa balay sang iya lola sa diin nagatenir si Jocelyn, gilayon man ini nga nagalakat.
