ROXAS CITY – Blangko pa sa karun ang pamilya sang biktima kun ano ang motibo sang mga suspek sa pagluthang-patay sa anay kapitan sang Brgy. Bayuyan sa bahin sang Brgy. Sto Niño, banwa sang President Roxas.
Sa interview sang Bombo Radyo Kay Romy Daluyo, utod sang biktima, ginpahayag sini nga gin-pahibalo na lamang sila sang mga residente nga ginluthang-patay ang iya magulang nga si Nelson Daluyo.
Suno diri, nasapwan nalang nila nga nagakaya ang biktima sa higad sang dalan kag may igo sa nalikod nga porsyon sang ulo lapos sa baba.
Mahibaluan nga nagikan ang biktima sa ila balay padulong sa ila ulumhan kaina sang aga, sang nasugat-an sini ang riding in tandem kag siya ang ginluthang.
Dugang pa ni Romy, nga wala man sila sang nahibaluan nga na kontra sang iya utod bangud masako man ini sa pagdumala sang iya ulumhan.
Sa pagpakig-angot naman sang Bombo Radyo kay Jobert Daluyo, bata sang biktima, ginpahayag sini nga wala man sang may gintuad ang iya amay nga may yara ini sang nabaton nga pagpamahog kag suno diri nga isa ka ma-amiguhon nga klase sang tawo ang iya amay.
Nagpromisa ang pamilya nga magakooperar sila kag ginatugyan na nila sa mga kapulisan ang imbistigasyon.
