Trauma ang nabatyagan sang pamilya sang apat ka nagkaladakpan sa buybust operation sang PDEA sa Bangbang Street, Barangay Inzo Arnaldo, Roxas City.
Sa interview sang Bombo Radyo kay alyas Thea, utod sang subject person, nagahigda sila upod ang mga kabataan sang gin-raid sang PDEA ang ila balay.
Pahayag pa sini nga ginpangtutukan sila sang armas kag ginhambalan nga nga maghapa.
Dugang pa sini nga gilayon sila nga ginpangtago kag ginpapahipos agud indi madalasa. Ginkalain pa sang iya buot bangud ginsakit ang iya manghod. Ginpangkuha pa suno diri ang kulintas nga gold sang ila amay kag anom ka cellphone ang nagkaladula sa operasyon sang PDEA.
Samtang, aminado naman ini nga posible nagagamit sang droga ang iya mga utod apang wala ang mga ini nagaduso.
Matandaan nga nadakpan sang gintingob nga puwersa sang Philippine Drug Enforcement Agency (PDEA) kag Philippine National Police (PNP) ang magpamilya nga sanday Anton Eduardo, 18-anyos, major subject; amay nga una na sadto nadakpan sa kapareho nga kaso nga si Antonio Eduardo Jr.; bata sini nga si John Kim Eduardo, 19-anyos; kag umagad nga si Gilbert Roxas, 24-anyos.
Naglab-ot sa napulo ka sachets sang suspected shabu ang narekober sa mga suspect kag ginabulubanta may market value nga P225,000.
Sa karon, nakahunong na sa detention facility sang PDEA ang mga arestado kag natalana pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002
