Nakaangkon na sang inisyal nga kasugtanan sa gastusan ang pamilya sang biktima kag ceres company matapos ang nagluntad nga aksidente sa Barangay Nasunogan, Dao, Capiz.
Ang biktima amo si alyas ‘Dionisio’, 48-anyos, driver sang motorsiklo kag residente ng Brgy. Matinabos, Sigma, Capiz. Samtang ang driver naman sang ceres bus amo si alyas Isagani, 55-anyos, kag residente sang Brgy. Caingin, La Paz, Iloilo.
Sa interview sang Bombo Radyo kay Police Captain Rey Contreras Dordas, Hepe sang Dao Municipal Police Station, iya ginpahayag nga handa ang kompanya nga sabton ang galastusan sang pamilya sang biktima.
Nahibaluan nga nagluntad ang amo nga insidente samtang ginasubay ang magkatuhay nga karsadahon sang magtimbang nga bahin, sang hinali nalang nga nagliso ang driver sang motorsiklo kag nabungguan sang ceres bus.
Bangud sa makusog nga impact, nag-angkon sang patal nga pilas sa lawas ang driver sang motorsiklo nga nangin kabangdanan sang iya kamatayon.
Nagpahanumdom naman ang natungdan sa mga motorista nga siguraduhon gid nga hawan ang kalye antes nga magliso ukon magpadulong sa pihak nga bahin kag magpahinay-hinay lang sa pagpadalagan sang tagsa ka mga behikulo agud malikawan ang disgrasya sa dalanon.
Interviewed by Bombo Sunnie Mae Batencila | via Bombo Reports Afternoon Edition
