ROXAS CITY – Desidido nga magpasaka sang kaso ang pamilya sang isa ka lalaki nga ginbuno sang iya kaugalingon nga ugangan sa Barangay Malitbog, Tapaz, Capiz.
Mahibaluan nga ginkilala ang biktima kay Orly Benerable Cornilio, 38-anyos, construction worker samtang, ang suspetsado ang ginkilala kay Leopoldo Majadora, 56-anyos, mangunguma, kag lunsay mga residente sang Barangay Caridad, Jamindan Capiz.
Matandaan nga base sa imbestigasyon sang Tapaz Municipal Police Station, ginpahayag nga nag-abot sa balay sang iya ugangan ang biktima nga yara sa impluwensya sang makahulubog nga ilimnon kag may nagpatunga nga indi pag-intindihanay sa duha.
Ginbadlong pa sang suspek ang iya umagad apang sa baylo nga magpati ini, nagpatunga ang mainit nga binaisay sa rason nga ginbuno ni Majadora si Cornilio sang makapila ka beses gamit ang kutsilyo kag madasig nga nagpalagyo sa wala matumod nga direksyon.
Bangud sini, nag-angkon sang patal nga pilas si Cornilio sa dughan kag liog nga nagresulta sang iya gulpi nga kamatayon.
Apang, wala man naka-antos ang amu nga suspetsado kag gilayon nga nagsungka sa mga kapulisan.
Sa karon yara na sa kustudiya sang Tapaz Municipal Police Station ang amu nga suspetsado para sa nagakaigo nga disposisyon.
