CUARTERO, CAPIZ – Desidido nga magpasaka sang kaso ang pamilya sang biktima nga ginluthang patay sang duha ka mga suspek nga lunsay mag-utod sa Sitio Malinong, Brgy. Poblacion Takas, Cuartero, Capiz.
Ang biktima amo si alyas Rogan, 46 anyos sang Barangay Poblacion Tacas samtang ang mga suspek naman amo ang mag-utod nga sanday alyas Owen, 47, kag alyas Aye, 46, mga residente man sang banwa sang Cuartero.
Sa interview sang Bombo Radyo kay PCapt. Jesse Lepaña, Hepe sang Cuartero Municipal Police Station, iya ginpahayag nga at-large pa sa gihapon ang mga suspek nga gilayon nga nagpalagyo pagkatapos ginhimo ang krimen.
Suno kay Lepaña, base sa imbestigasyon, ginaalegar gintuyo nga sudlon sang biktima ang balay sang tiya sang mga suspek kag pagkaaga, ginkadtoan sang mag-utod si Rogan nga nagahigda sa sulod sang balay kag ginluthang gamit ang ginapatihan caliber 45 nga armas.
Posible nga may yara sang hiligut-anon ang mga suspek sa biktima.
Narekober sang mga pulis ang empty shells kag ipaidalom ini sa cross matching agud madetermina kun sin-o ang nagapanag-iya sang armas.
Gindala naman palagyo sang mga suspek ang armas nga gingamit sa pagpangluthang.
