ROXAS CITY – Wala na sang plano nga magpasaka sang panumbungon ang pamilya sang biktima batuk sa iya anak nga amo ang suspek sa pagpatay sa iya amay sa Sitio Puntod, Barangay Dinginan, Roxas City.
Suno kay Police Lieutenant Colenel Ricardo Jomuad Jr., nga nag-execute na sang affidavit of non-interest si Corazon Azuro, tiayon sang biktima nga si Rizaldo Azuro sa diin wala na sila sang plano nga pasakaan sang panumbungon ang suspek nga ila man anak nga si Roger Azuro.
Matandaan sang tinalikdan nga adlaw plano man kuntani sang utod sang biktima nga si Maria Delfin nga pasakaan sang panumbungon nga Parricide ang ila sini nga gumangkon.
Apang, kahapon nga adlaw nag-execute man ini sang affidavit of non-interest sa Roxas City PNP.
Samtang, suno naman kay Ramil Azuro, ang utod sang suspek nga nakasugtanan naman sang pamilya nga indi na lamang pagpasakaan sang panumbungon ang ila utod.
Sa karon, plano sang pamilya Azuro nga ipabulong na lamang nila ang ila nga utod nga si Roger sa diin ginaalegar nga may yara ini sang deperensya sa paminsaron.
Yara naman nakahaya ang bangkay ni Rizaldo sa isa ka punerarya diri sa siyudad sang Roxas.
Samtang, natalana naman nga hilwayon sa karsel sang Roxas City Police Station ang suspek buas nga adlaw.
