ROXAS CITY – Personal nga nagdangup sa Bombo Radyo Roxas ang amay sang isa ka Capizeña overseas Filipino worker sa Riyadh, Saudi Arabia bangud sa ginaalegar pagmaltrato sang employer sa iya nga anak.
Sa exclusive interview sang Bombo Radyo Roxas kay Mr. Wilson Bolido sang Barangay Talon, Roxas City, ginpahayag sini nga nabalaka na sila sa sitwasyon sang anak nga si Roselyn Bolido Rotolo matapos nga duha na ka semana ini nga wala nagakontak sa ila.
Apang antes nadula ang ila nga komunikasyon ginsugid sang biktima sa amay nga luyag na sini nga makapauli bangud nabudlayan na ini sa iya nga trabaho bilang household service worker.
Nahibaluan nga indi lamang ang balay sang employer ang iya nga ginatinluan,kundi kalakip ang balay sang abyan sang iya nga employer.
Ginreklamo man sang biktima ang indi supisyente nga pagkaon nga ginahatag sa iya, rason nga masami na lamang nagalain ang iya pamatyag bangud sa gutom.
Ginaalegar pa nga ginapreso man sang iya employer ang biktima kag ginakuha ang cellphone agud indi ini makasugid.
Sa karon luyag lamang ni Mr. Bolido nga makapauli na sa Pilipinas ang anak, para indi na sila magkabalaka pa.
Nahibaluan nga may asawa kag duha ka mga kabataan ang Capizeña OFW nga nabilin sa Pilipinas.
