ROXAS CITY – Nasabat na ang pangamuyo sang pamilya de Felipe nga malakip ang Capizeño gold medalist nga si Jimwell de Felipe sa delegasyon sang Rehiyon 6 sa patigayunon nga Palarong Pambansa 2019 sa Davao City.
Ini ang ginkumpirma sang iloy sang atleta nga si Mrs. Irene de Felipe sang mainterview sang Bombo Radyo Roxas.
Suno kay Mrs. de Felipe nakabaton na sila sang mensahe gikan sa coach ni Jimwell nga si Ms. Sherie Rovelle Villar nga mangin kabahin sang delegasyon si Jimwell kag ginahikot na ang nagakaigo nga dokumento sang atleta sa Iloilo para sa nasambit nga sporting event.
Daku man ang pagpasalamat ni Mrs. de Felipe bangud sa mga bulig kag suporta nga ginahatag sa anak para lamang nga makahampang ini sa Palarong Pambansa 2019.
Nahibaluan nga natalana nga magpadulong si Jimwell sa Davao City sa Abril 18.
Matandaan nga nangin kontrobersiyal ang wala pagkalakip sa listahan sang mga atleta gikan sa Rehiyon Sais nga makahampang para sa nasambit nga sporting event si Jimwell apisar nga nakakuha ini sang bulawan nga medalya sa walkaton secondary boys.
Sa karon nagapadayon ang paghanas sang nasambit nga atleta bilang preparasyon sa paghampang sini sa Palarong Pambansa 2019.
