Hustisya ang panawagan sang pamilya nanday Seaman Second Class (SN2) Reniel Agpalo kag Apprentice Seaman (ASN) Louther John Vitor, ang duha ka Philippine Coast Guard (PCG) personnel nga napatay sa pagpangluthang sa Roman Vilo Street, Poblacion 6, Cotabato City.
Sa tunga sang tuman nga kasubo, nagapanawagan ang mga namatyan nga pamilya nga mapaathag ang kamatayon sang ila mga pinalangga kag mapanabat ang mga tawo nga yara sa likod sang krimen.
Para sa ila, ang ila gina-atubang indi lang ang pagpangasubo, kundi ang paghulat sang kamatuoran kag nagakaigo nga hustisya para sa mga biktima.
Lunsay patay sanday Agpalo kag Vitor, residente sang Butuan City matapos nga ginluthang sang duha ka wala makilala nga mga suspetsado samtang sakay sa salakyan kaupod ang ila station commander.
Base sa report, padulong kuntani sa ila istasyon ang mga tinawo sang PCG sang ginluthang sang mga armado nga suspetsado nga gilayon nga nagpalagyo matapos ang insidente.
Wala naman napilasan ang ila station commander.
Padayon ang imbestigasyon sang mga otoridad agud mahibaluan ang identity sang mga suspetsado kag ang motibo sa pagpangluthang.
Gina-imbestigaran man kun ang pagpang-atake ang may kaangtanan sa ila katungdanan bilang PCG personnel.
Sa pihak sang daku nga kasakit nga ginbilin sang trahedya, nagapabilin nga nagalaum ang pamilya sang mga biktima nga indi malipatan ang natabo sa ila mga pinalangga.
Luyag nila pangitaon ang mga responsable, manabat ang sin-o man nga mapamatud-an nga nadalahig, kag matigayon ang hustisya para sa duha ka public servants nga nadulaan sang kabuhi.
