ROXAS CITY – Desidido ang pamilya ni Baltazar Saldo sang Barangay Sto. Angel, Dumalag, Capiz nga magpasaka sang nagakaigo nga reklamo batuk sa mga operatiba nga nagdakop sa ila himata kag nagserbi sang apat ka warrants of arrest matapos nasal-an ini nga lider sang rebelde nga grupo.
Sa interview sang Bombo Radyo Roxas kay Nilo Saldo, utod ni Baltazar, ginpahayag sini nga daku nga kahuy-anan sa ila nga pamilya ang kapalpakan sang mga miyembro sang Police Regional Office 6, Regional Intelligence Division kag Philippine Army 61st Infantry Battalion nga nag-aresto sa iya utod.
Halos nagahilibion man si Nilo sang ginlaragway ang utod nga isa ka maayo nga tawo nga nagatinguha sa legal nga pamaagi bilang isa ka driver agud mabuhi ang iya pamilya.
Suno pa kay Nilo, halos wala na sila sang nawong nga iatubang sa tawo bangud nangin unod sang estoryahanay ang pila pamilya kasunod sang sala nga pag-aresto sa iya utod.
Nahadlok naman sila sa posible matabo sa ila pamilya matapos nasal-an nga lider sang rebelde nga grupo si Baltazar.
Mahibaluan nga sa ginpatigayon nga validation naguha nga nasal-an lamang si Saldo nga si Virgilio Paragan, commanding officer sang ng Roger Mahinay Command, Komiteng Rehiyon-Negros sang Communist Party of the Philippines-New People’s Army (CPP-NPA) sadtong tuig 2000 tubtob 2004 nga madugay na nga ginaayam sang mga otoridad.
