ROXAS CITY – Gindepensahan sang pamilya Danid ang ila nga 19-anyos nga himata nga ginaalegar nagpangawat sang mga manok sa Barangay Lagdungan, Tapaz, Capiz.
Sa interview sang Bombo Radyo kay Jenelyn Danid 26-anyos magulang sang suspek nga si Romy Danid ginpahayag sini nga indi matuod nga nagpangawat ang ila utod sang manok sa isa ka retirado nga pulis nga si Retired Police Manuel Gabucay 69-anyos sang amo man nga lugar.
Ginaalegar ni Jenelyn nga posible planted ang ginhimo sini sa utod bangud ginsugo lang ini ni Danny Gialogo, tag-iya mismo sang mga manok nga ibaligya ini sa merkado.
Samtang, sa interview sang Bombo Radyo Roxas kay Police Captain Bryant Fallera, hepe sang Tapaz Municipal Police Station, ginaalegar nga naaktuhan sang isa ka residente ang suspek nga naguha sa panimalay ni Gabucay kag may yara na sang bitbit nga sako nga may unod nga (2) ka mga munga kag (2) ka mga sulog nga manok.
Ginkumpirmar man ni Gabucay nga ginapanag-iyahan sini ang nasambit nga mga manok.
Dugang pa ni Fallera nga sang gintsekyar ang panimalay sang suspek, nakita diri ang pila ka mga cellphone, tablet nga ginapatihan posible nga ginkawat man sini.
Nahibaluan nga madamo na sang rekord sa barangay ang suspek.
Apang, nahilway naman ini subong sa karsel sang Tapaz PNP.
