Ginkumpirmar mismo sang pamilya sang isa sa duha ka Overseas Filipino Worker (OFW) nga napatay nga isa ang ila himata ang nalakip nga biktima matapos nagluntad ang sunog sa Kuwait.
Ginkilala ang mga biktima kanday Kein Barros, 37-anyos, kag Janeth Delgado nga lunsay mga residente sang Brgy. Casanayan, Pilar, Capiz.
Sa interview sang Bombo Radyo kay Karen Morales, utod ni Kein Barros, ginpahayag sini nga 2 years na nga ofw ang iya utod sa Kuwait.
Nabal-an sang pamilya Barros ang natabo pinaagi sa isa ka social media post sang katrabaho sini sa Kuwait nga ginkilala kay alyas “Paula” kun sa diin gilayon man sini nga ginkumpirmar nga duha ang mga napatay lakip sanday Kein kag Janeth nga ulupdanay sa ubra sa Kuwait.
Sa nakuha nga impormasyon sang pamilya, ginapahayag nga ang ginatudlo nga rason sang gintunaan sang sunog sang naga-ritwal ang amo nga tigulang sang mga biktima. Ang ritwal ang daw kaangay nga nagabuok ang mga ini, kag bangud winter season subong sa lugar, ginaalegar nga nag-alapok sa mga unlan ang baga sang ginahimo nga ritwal nga ginaalegar nga ginatudlo nga gintunaan sang nasambit nga sunog.
Dugang pa ni Karen, nangita pa sang paagi ang duha ka mga biktima agud makaguwa sa lugar apang napaslawan ang mga ini nga makapangita sang dalan rason nga nagsulod ang mga ini sa CR sa lugar kag didto nalang man ang mga ini nasapwan nga wala na sang kabuhi.
Suffocation naman ang ginapahayag nga gintunaan sang gulpi nga kamatayon ni Barros kag Delgado.
Sa karon, nagpakig-angut na ang pamilya sang mga biktima sa ahensya sang duha kag mangin sa Overseas Workers Welfare Administration (OWWA) para sa mga proseso nga ila pagahimuon agud mapauli ang mga bangkay sa mga nasambit nga biktima sa Pilipinas.
