ROXAS CITY-Blanko pa sa karon ang pamilya sang lalaki nga ginsalvage sa Barangay Dolores, Dumalag Capiz sa identity sang mga suspetsado kag motibo sa pagpatay sa biktima.
Sa interview sang Bombo Radyo sa kay ginang Emily Lozada, iloy sang biktima nga si Erlon Lego 26-anyos sang Barangay Bagumbong, Lambunao, Iloilo, ginpahayag sini nga tuman ang iya nga kakibot sang nahibaluan nga ginpatay ang anak sini sa nasambit nga lugar.
Wala pa ini sang may maitudlo nga mga indibidwal nga responsable sa pagpatay kay Erlon bangud sa pagpati sini nga wala man sang kontra ang iya nga bata.
Ginkompirmar sini nga napreso ang bata sini sa Bureau of Jail Management and Penology (BJMP) sa probinsiya sang Iloilo apang wala ini sang ideya kun ano nga kaso ang ginkaulamiran sini bangud madugay na sila nga wala makakitaay.
Samtang ginkompirmar man sang ginang nga naga-live na ang iya sini nga bata kag si Rose Bering, ang babayi nga ginsalvage man sa Barangay San Juan, Dumarao Capiz.
Suno sa kay Lozada nga ginpakilala pa sa iya ni Erlon si Rose Bering antes ginpatay ang duha.
Sa karon nagapaninggitan ini sang hustisya sa kamatayon sang iya nga anak.
