Nagapati ang pamilya sang isa ka miyembro sang LGBTQ nga ginluthang-patay sa Barangay Gabuan, Roxas City nga naulamid lang ini sa mga atraso sang live in partner sini.
Sa interview sang Bombo Radyo kay Eliza Rodriguez, tiya sang biktima, ginpahayag sini nga mabuot kag mabinuligon nga klase sang tawo ang biktima nga ginkilala kay alyas “Charina”, 30-anyos kag residente sang Brgy. Lawa-an sining syudad.
Wala man suno sila sang may nahibaluan nga may tawo nga nakaaway ukon may kaakig kay Charina rason nga ginkakibot na lamang sang mga ini ang natabo sa ila himata.
Dugang pa sini, nagapati ang pamilya sang biktima nga naulamid lang ini sa mga atraso sang iya live in partner nga si alyas “Michael” nga nadakpan kag nakuhaan sang armas-luthang sang mga otoridad sang damlag lang kag nakahunong sa karon sa karsel.
Matandaan nga wala na sang kabuhi si Charina matapos nga ginluthang-patay sa nasambit nga lugar samtang, madasig naman nga nakapalagyo ang mga wala pa makilan-an nga suspetsado sakay sang isa ka motorsiklo.
Sa karon, padayon pa ang imbestigasyon sang Roxas City PNP angut sa nasambit nga pagpangluthang.
