ROXAS CITY – Nagasinggitan subong sang hustisya ang pamilya Baylen matapos ang natabo sa isa ka ginang kag lapsag sini nga napatay bangud sa ginaalegar kapabayaan nga ginhimo sang pila ka mga medical personnel sa Bailan District Hospital sa banwa sang Pontevedra, Capiz.
Sa exclusive interview sang Bombo Radyo sa ugangan sang pasyente nga si Sherlita Baylen 56-anyos nga nakabatyag sang pagpalanakit sa pus-on ukon tiyan kag paglain sang pamatyag ang umagad sini nga si Mary Cris Baylen 30-anyos sang Barangay Cubay, Pres. Roxas, Capiz sang gab-i sadtong Oktubre 24.
Bangud diri, gindala nila ini sa amo nga ospital bangud ginhatagan man sila sang ila doktor nga si Dra. Hao sang referral nga didto na lang magabun-ag ang ginang.
Sang nakaabot na sila sa emergency room sang amo nga ospital ginlantaw sang mga medical personnel ang vital signs kag gintsekyar ang blood pressure ni Mary Cris nga nagalab-ot sa 200/110.
Apang, ginkalain na lamang sang buot sang pamilya sang pasyente bangud daw kasubong ginpabay-an kag wala ginhatagan sang pagtamud ang ila pasyente.
Ini bangud Oktubre 24 sila nagkadto sa amo nga ospital apang Oktubre 25 na ginlantaw ang kondisyon sang amo nga pasyente kun sa diin nabudlayan na ini sa pagginhawa kag nagapalanggit-om na sini ang itsura.
Kasunod sini, gintakdan nila sang dextrose, oxygen kag catheter ang amo nga pasyente.
Apang, ginkatingala ni Sherlita nga indi na ihi ang nagaguwa sa pasyente kundi dugo rason nga ginpamangkot niya ang nurse apang ginpahayag sa iya nga normal lamang ini.
Magluwas diri, nadismaya man sila bangud kasubong wala ginhatagan sang pagtamud sang mga medical personnel ang ila pasyente kun sa diin ginrefer na lamang sila sa pribado nga ospital sa siyudad sang Roxas bangud wala sang available nga doktor.
Suno naman sa bana ni Mary Cris nga si Noriel Baylen 32-anyos nga gindala pa ang pasyente sa Capiz Doctor’s Hospital sakay sa ambulansya agud didto na lamang nga magbun-ag apang ginapahayag nga wala na heartbeat ang lapsag sa sulod sang taguangkan ni Mary Cris.
Ginbun-ag pa sang pasyente ang amo nga lapsag apang wala na ini sang kabuhi kag pagkatapos gindala man ini sa ICU kun sa diin didto man ini ginbawian sang kabuhi.
Bangud diri, tuman na lamang ang kasubo sang pamilya Baylen bangud duha ka kabuhi gid ang nadula sa ila pamilya bangud sa ginaalegar kapabayaan sang ospital nga una nila ginkadtuan.
