Desidido nga magpasaka sang kaso ang pamilya sang duha ka mag-utod nga biktima sang pagpangbuno sa isa ka peryahan sa Barangay Punta Tabuc, Roxas City.
Matandaan nga ginkilala ang nagkalapilasan nga sanday alyas Arnel, 20-anyos, alyas Angelo, 22-anyos nga lunsay mga residente sang nasambit nga Barangay kag alyas James, 22-anyos nga residente naman sang Barangay V, Roxas City.
Sa interview sang Bombo Radyo sa amay sang duha ka mag-utod, wala nila ginlauman nga matabo ang kasubong nga insidente bangud masami man nga nagapadulong ang iya mga kabataan sa peryahan.
Mahibaluan nga base sa CCTV footage nga nakuha sa ginluntaran sang insidente, makit-an si alyas Angelo kaupod ang iya manghod nga si alyas Arnel nga madasig kag agresibo nga nagsulod sa nasambit nga “Peryahan”.
Pagkatapos sini, may nagluntad nga mainit nga pagbinaisay nga nagtuga sang komosyon sa tunga sang mag-utod nga si Angelo kag Arnel batuk kay alyas James kag manghod sini nga si alyas Leo.
Gani, nagahinyo ang amay sang mga biktima nga mas maayo nga ipull-out na lamang ang nasambit nga peryahan agud indi na masulit pa natabo nga kinagamu.
