Wala na sang plano ang pamilya sang mangingisda nga nahulog-patay sa ginasakyan nga sakayan pandagat nga ipaidalum sa autopsy ang bangkay sang ila himata.
Ginpahayag ni Police Master Sergeant Ronnie Recto, imbestigador sang Roxas City PNP nga nagapati ang pamilya ni Ronald Guzman 22-anyos sang Balud, Masbate nga wala sang foul play sa kamatayon sang biktima kag aksidente ang natabo.
Sa pagpakig-angut sang kapulisan kay Alex Flugencio, kaupod ni Guzman sa ginasakyan nga sakayan pandagat nakita sini nga nagapungko ang biktima sa regalia sang sakayan.
Apang kasubong nga napiyungan kag nahulog sa fishing boat bangud sa kahulugbon.
Gilayon man nga naglumpat sa tubig si Flugencio para mabuligan si Guzman, apang wala niya ini makita tobtob nagbulig pangita ang iban nila nga kaupdanan, apang napaslawan sila nga makita ang biktima.
Las 3:40 sang kaaganhon sang nagpadulong sila sa PCG office kag ginpahibalo ang natabo.
Nagpatigayon sang rescue operation ang PCG, apang bangud sa kadulom sa idalum sang tubig, ginpakamaayo nila nga paagahon tobtob nakita ang bangkay sang biktima.
Duguon ang duha ka dalunggan kag may pilas sa natuo nga kilay ang biktima sang madala na sa ibabaw sang sakayan.
Ginapatihan nga posible nabunggo ang ulo sini sa solar panel sang sakayan nga himo sa sansalon.
Nahibaluan nga duha na ka adlaw nga nakastandby sa baybayon sang Barangay Culasi ang fishing boat bangud nasamad ang ila makina.
