Nagapati ang pamilya sang manugpangisda nga nasapwan nga nagalutaw-lutaw sa Barangay Lat-asan, Panay, Capiz, nagapati nga wala sang foul play sa kamatayon sini.
Ang biktima amo si alyas Dar, 52- anyos kag residente sang Sitio Talangnan, Brgy. Pawa, Panay, Capiz.
Sa interview sang Bombo Radyo kay Police Captain Eric Deocampo, Hepe sang Panay Municipal Police Station, iya ginpahayag nga pasado alas-6:30 sang aga sang adlaw sang Lunes, nagbiya sa ila puloy-an ang biktima agud magpangisda sa kalalawran apang nakit-an nalang ang ginasakyan sini nga motor banca nga nagalutaw-lutaw sang iya nga gumangkon kag wala na sang sakay.
Suno kay Deocampo, gilayon man nga nagpatigayon sang search and rescue operation ang MDRRMO-Panay, upod ang Philippine Coast Guard kag Bantay Dagat kag kahapon nga adlaw, nasapwan sang isa ka residente ang lawas sang biktima nga nagalutaw malapit sa isa ka fishing trap sa baybayon sang Barangay Lat-asan.
Sa subong, yara na sa isa ka punerarya ang bangkay sang biktima kag ginahanda nga nga ipauli sa ila sini nga panimalay.
