Indi na magpasaka sang kaso ang pamilya sang menor de edad nga napatay sa nagluntad nga aksidente nga pagbungguanay sang topdown tricycle kag motorsiklo sa Brgy. Agdahon, Cuartero Capiz.
Sa interview sang Bombo Radyo kay PCAPT ALLADEN TALANAN, nag-settle ang magtimbang nga bahin kag nagkasugot nga bayaran nalang ang mga galastusan ilabi na sa pagpalubong sa biktima. Matandaan nga ginkilala ang biktima kay alyas “Nonoy”, 14 anyos, samtang ang driver sang top-down ang ginkilala kay alyas “Jan”, 20 anyos nga lunsay residente sang nasambit nga lugar kag ang driver naman sang motorsiklo ang ginkilala kay alyas “Toto” 15 anyos nga residente sang Barangay Mainit sa amo nga banwa.
Base sa imbestigasyon sang kapulisan, nagasakay ang biktima sa top-down tiricycle nga may karga nga ice cream cart nga ginamaneho ni alyas “Jan”.
Ginapahayag nga ginlikawan ni alyas ‘Jan’ ang buho sa dalan, kabangdanan sang pagkabunggo sini sa kasugata nga motorsiklo nga ginamaneho ni alyas ‘Toto’.
Mahibaluan, nga tungod sa impact sang pagkabunggo sang top-down sa motorsiklo, hinali ini nga nagwaslik kag naipit ang biktima sang ice cream cart, nga kabangdanan sang iya sini nga kamatayon.
Sa karon, nakahamyang sa puluy-an sang biktima ang iya sini nga bangkay.
