ROXAS CITY – Handa nga magpasaka sang nagakaigo nga kaso ang pamilya sang mga senior citizen kag isa ka menor de edad nga ginmartilyo, ginsumbag kag ginkawatan sa takna 11:30 sang gab-i, sang tinalikdan nga Hunyo 10 sa Sitio Dayas, Barangay Timpas, Panitan.
Matandaan nga ginkilala ang mga biktima nga sanday Lydia Deslate, 85-anyos, Angelita Deslate, 62-anyos kag isa ka menor edad.
Sa interview sang Bombo Radyo kay PSSG. Dale Daliva imbestigador sang Panitan Municipal Police Station, ginpahayag sini nga may yara na sila sang tatlo ka mga person of interest angut sa insidente kag bangud man sa pagkumpirmar sang mga biktima.
Suno kay Daliva, naglab-ot sa halos P30,000 ang nataban sang mga wala makilan-an nga mga suspetsadto nga nagikan sa kita nga ginbaligya nga mga kasapatan sang mga senior citizen.
Ginpahayag man sini nga wala sang iban nga motibo ang mga suspetsado kundi ang kwarta lamang.
Mahibauan nga samtang nagatan-aw sang TV si Angelita, sang nakabati ini sang lagubo nagikan sa kusina, sa iya sini pagtsekyar, nakit-an sini nga guba na ang hardiflex nga nagaserbe pader sang ila kusina malapit sa pirtahan, sang gulpi na lang may nagmartilyo sa iya nga likod kag gintunaan sang pagkadula sang iya alinto.
Bangud sa kinagamo, nagguwa sa ila kuwarto sanday Lydia kag ang menor de edad, apang ginapahayag gilayon nga ginsumbag sa dughan ang tigulang nga nagresulta sang pagkatumba.
Sa karun, nagapadayon pa ang imbetigasyon sang mga otoridad angut sa insidente kag nakaguha na ang mga biktima sa ospital.
