ROXAS CITY – Nagapati ang pamilya sang apat ka mga pasyente sa Intensive Care Unit sang Roxas Memorial Provincial Hospital nga ang blackout kag pagbisyo sang generator-set sang ospital ang rason sang pagkamatay sang ila mga himata sang nakaligad nga Disyembre 2019 sang nagpanalasa ang bagyo nga Ursula.
Ini ang kasunod sang ginpatigayon nga legislative inquiry sang Sangguniang Panlalawigan sa session hall sang kapitolyo-probinsiyal.
Ang una nga adlaw sang nasambit nga imbestigasyon ang gintambungan sang pila ka miyembro sang provincial board kag pamilya sang napatay nga apat ka mga pasyente.
Sa amo nga imbestigasyon, gintuad sang pamilya sang napatay nga mga pasyente nga hugot ang ila pagpati nga bangud sa malawig nga inoras nga wala sang kuryente rason nga napatay ang ila himata.
May nagpahayag man nga may oras nga ginpaandar sang ospital ang ila generator-set apang nagabisyo man ini kag nagapatay-patay.
Suno kay Analyn Sabio, iloy sang napatay nga si Rutchel Sabio sang Aglalana, Dumarao, mapagsik pa ang iya anak samtang yara ini sa ICU kag mabakas paman ini magkaon.
Apang suno diri, sang nadulaan sang kuryente, posible suno sa iya nga naapektuhan ang iya anak bangud may tubo sa iya lawas nga gina-operate pinaagi sang kuryente.
Matapos ang pila ka ginutlo suno sa iya diri na kag nagbula ang baba sang iya anak kag napatay.
Suno naman sa wala na ginhingadlan nga amay, sang na-confine pa ang iya anak sa ICU sang amo nga ospital, nanotisyahan niya man ang kasubong pagpabaya sang mga nurses kag doctors sa pagtatap sa mga pasyente.
Kun indi pa suno diri sila magpangisog, kasubong wala pa sang plano ang mga staff sang ospital nga tatapon ang ila nga pasyente.
Mahibaluan nga duha ka adlaw ang patigayunon nga legislative inquiry sa diin sa una nga adlaw nagtambong ang pamilya sang apat ka mga biktima nga nagkalamatay kag sa ikaduha nga adlaw imbitahon naman ang mga opisyales sang ospital nga ginalakipan sang chief of hospital, head nurse, maintenance division kag iban pa.
Gintalana ang ikaduha nga adlaw sang legislative inquiry sa Enero 29, Miyerkules nga adlaw.
