ROXAS CITY – Kumbinsido ang pamilya sang nasapwan patay nga lalaki sa Sitio Lanipga, Brgy. Sinamongan, Pilar, Capiz, nga wala sang foul play sa kamatayon sang ila himata.
Matandaan nga ginkilala ang biktima kay Roger Evangelista, 48 anyos kag residente man sang nasambit nga lugar.
Sa interview sang Bombo Radyo kay PMaj. Alfred De Leon hepe sang Pilar Municipal Police Station, ginpahayag sini nga ba-se sa ila pagpangusisa kay Marivic Evangelista 41-anyos asawa sang biktima wala sila sang natandaan nga may yara sang kaaway ang iya bana sa ila barangay bangud sa pagkamatuod suno diri kilala na sang tanan ang iya bana sa ila lugar bangud ginapahayag may yara ini sang deperensya sa paminsaron.
Pahayag pa ni De Leon, posible nagtabok ang biktima sa latayan kag nadanlog bangud basa kag posible nagtupa ang ulo sini sa matig-a nga bagay rason nga gintunaan sang iya pagkalumos kag nagresulta sang iya kamatayon.
Samtang, ginahulat naman subong nga adlaw ang resulta sang postmortem examination sang biktima agud mahibaluan kun anu ang gintunaan sang iya kamatayon.
